قصة خيالية ترفيهية سياسية مش اكتر ،،،

من الأول عشان مش عايزين عواء

القصة ألتى بصدد ان تقرأها لا تمت للواقع بصلة و اى تشابة فى أحداثا مع الواقع نتاج خيال القارىء المريض و انا ماليش دعوة و ربنا

يحكى ان فى وسط الصحراء الغربية الشرقية كان فى بلد جميلة عظيمة 

البلد دى كان بيحكمها وأحد عجوز كدة قاعد على الكرسي بقالو يجى ٣١ سنة (مش ٣٠ سنة ماشى بلاش تقليف من عندك)

المهم الراجل بقى كان عايز بعد ما يبطل و يعتزل و كدة يمسك ابن اختة مكانة (ماعندوش عيال اعملك اية)

و البلد كان شعبها فقير و الجهل منتشر فية و فى فروق طبقية رهيبة عشان الباشا الماسك البلد عمرة ما فكر يعلم الناس و لا يعالجهم ولا حاجة

المهم كان فى واحد ماسك مركز مهم اوى فى الجيش ممكن نقول مثلا،،،،المدير الفنى بتاع حرس الحدود ،،،ولا قائد الشؤون المعنوية مثلا أو حتى ممكن نمشيها رئيس جهاز المخابرات الحربية

الراجل دة كان متعلم فى أمريكا علام نظيف يعنى و كان ذكى جداا و طموح و وطنى الى اقصى الحدود و كان طويييييل اوى و طول عمر بنطلونة فى وسطة بالظبط و لا فوق سنة ولا فوق سنتين 

الراجل دة بحكم مركزة الحساس كان بيوصلو تقارير عن كل حاجة فى البلد ،،،عن الأسعار و الحالة النفسية و المزاجية للشعب و عن الطبقة الحاكمة و عن كل حاجة تقريبا

و بعد سنين من الملاحظة و المراقبة قدر يوصل لنتيجة واحدة بس

الراجل العجوز فعلا حايقدر يورث ابن اختة الحكم بمساعدة شوية شلل حاوالية و حيكون فى مقاومة بسيطة من الشعب بس حيتم قمع جزء منها و شراء الجزء الأكبر 

الموضوع خطير لعدة أسباب 

أولا عيب اوى على دولة بالحجم دة يتم توريثها كأنها ترابيزة ولا كرسي

ثانيا الولا ابن أخت الراجل الكبير بتاع بيزنس و بس مابيفهمش حاجة فى السياسة و يبيع آهلة عشان يكسب صفقة 

ثالثا عيب على بلد كل المسكوها من الجيش يجئ واحد من براها و يتحكم فيها كدة و خطر على الجيش نفسة لأنة ممكن يدخله فى تى صفقة ماحدش يعرف مداها اية 

فا قرر الاتى

لازم الراجل الكبير يمشى هو و ابن اختة و كل الطقم المعاهم

و لازم يكون مشيهم بثورة و بحد أدنى لتدخل الجيش فى الموضوع عشان مايتقلش ان الجيش هو الشالة عشان يحكم بدالة

و هنا قابلتة مشكلة ،،،حيمشى بثورة ازاى و الشعب اصلا مش لاقى يأكل و النخبة الممكن تقود الثورة نخبة قديمة مهلهلة و لا تتمتع بالثقة وسط الشعب دة نهائيا 

الراجل الذكى الطوييل جدا فكر و وصل لنتيجة ان ممكن خلال سنة أو أكثر يتم الدفع بقيادات شابة فى الإعلام

الناس دى من غير ما تفهم مين الدفع بيهم اصلا ممكن  يسخنو الشعب و يزرعو بذرة الثورة وسطهم و يركزو على الشباب المتعلم المرتاح هو اليقدر يحشد و يوصل لعدد كبير عن طريق شبكات التواصل الاجتماعي

و اول ما القيادات دى تنزل الشارع مع غباء النظام و داخليتة حايخلو بقت الناس تتعاطف معاهم و تنزلهم و اعتمد كمان على انتهازيت الجزء المنظم فى المعارضة الأول ما حي شوف بوادر سقوط للنظام حينضم للشارع و ساعتها الإعداد حتكون كبيرة و دة أكيد حايدى الى سقوط النظام

طيب و بعدين بعد ما يسقط النظام

أكيد الشعب مش حايبقى عايز الجيش بردو و حيبقى عايز قيادة مدنية

و ساعتها نفس الجزء المنظم من المعارضة حاينط على الكراسى كلها و حايخدها

خصوصا ان الجماعة دى طول عمرها بتاجر بالدين و بالغلابة المطحونين من الشعب 

بس الراجل الطوييييل اوى قدر يوصل لحل بردو

و شاف ان سقوط الناس دى حايكون أسهل بكتير من سقوط النظام الاولانى لان هذه الجماعة بطبعها مراوغة و ملاوعة و عمرها ما كانت ليها كلمة

و علاقتها المشبوهة بناس كتير اوى حولينا ممكن تخليها ضعيفة

و عدم قدرتهم على الحكم ولا اللعب على المكشوف حتخلى وقوعهم سهل

مجرد شوية لعب بالخيوط الداخلية للدولة زى الكهرباء و البنزين والاقتصاد

مع تسريبات عن العلاقات المشبوهة مع شوية شباب يشعلو الحالة الثورية الهى لسة موجودة وسط الشعب دة ممكن يستفذو الجماعة عشان يطلعو أسوء ما عندهم

ساعتها الناس حتخاف،،،،حيلاقو دم فى الشوارع و انعدام أمان و خوف حقيقي على البلد

مع ضعف الداخلية من المواجهات السابقة 

الشعب مش حيلاقى غير الجيش كا ضامن و حامى للحياة الطبيعية المستقرة الهما كانو متعودين عليها

و مع الاعتماد الكامل على غباء قيادات الجماعة نقدر نضمن ان الشعب حيروح يترمى فى حضن الجيش و يقولة سامحنى أرجوك ،،،،

انا غلط تعالى احكمنى و نبى

ساعتها الموضوع حيبقى فى ايدة تماماً

بس الراجل الطويييل اوى الذكى قرر أنة مش لازم يحكم

قرر ان الشعب دة غالبان فعلا و ممكن نضحك علية و نديلة قيادة مدنية فعلية مع الاحتفاظ للجيش بكامل استقلالة فى الميزانية و فى الرتب الكبيرة و فى عدم محاسبت قياداتة

و مين عارف ،،،يمكن بعد سنين و سنين الجيش يرجع يحكم تانى

أو البلد فعلا تتقدم و يبقى عملنا خير فى البلد

و توتة توتة خلصت الحدوتة الخيالية واللا تمت لاى واقع بصلة 

اصلا الخيال واسع اوى

حاجة كدة خيال علمى عمرها ما تمشى كدة ابدااااا

بلاش بقى تفكير و دماغ بايزة و تقولى انا شوفت الكلام دة قبل كدة

أنسى الانت قاريتة

بص للضوء 

ركز كويس

تششك

الهرى و التخوين و أشياء أخرى

قابلت مؤخراً كام واحد كدة و سألوني انت بطلت تكتب و لا اية

ريحتنا خلاص من الهرى و الفتى الكنت تاحفنا بية 

بصراحة

فى الجو الضبابى العجيب دة حتى الهرى و الفتى مش عارف أعملة 

انا تقريبا من يوم ٣/٧ و انا مش راضى اكتب حاجة عشان مش فاهم آوى احنا داخلين على اية

و عشان كمان اتعملت الدرس بتاع ٢٥ يناير لما الناس معظمها و انا واحد منهم كان عندها حالت تفاؤل غير طبيعية و جة بعديها حالة إحباط عام قضى على أحلام ناس كتير آوى

و اتعملت درس مهم جدا كمان

ان الشخصية المصرية ليها خصوصيتها فعلا (زى ما بيقعدو يهرو فى التوك شوز)

المصريين ممكن فى لحظة يعملو حاجة عبقرية مستحيل أنها تتعمل و تخلى العالم كلة واقف مش فاهم ازاى الشعب دة عمل كدة و يفضلو كتير يحاولو يحللو و يفهمو عبقرية هذا الشعب

و قبل ما حد يوصل لنتيجة نكون عملنا مجموعة من أعبأ و أهبل الخطوات تخيلنا فى منتهى البساطة نرجع لمربع صفر و فى بعض الأحيان تحت الصفر كمان لو حبينا

يعنى ملايين المصريين نزلو الشوارع فى ٣٠/٦ و عملو حاجة العالم مش قادر يصنفها لحد دلوقتى مرة يقولك انقلاب و مرة يقولك ثورة و فى الاخر قالك انقلاب ديموقراطي 

و بعدين كالعادة حالة من الغباء العام فى البلد

ناس ماشية تقولك الجيش ركب و مش حاينزل أبدا و حايخلصو على الاخوان و يتدورو على النشطاء و كل الشغالين فى السياسة و حيسجنوهم يا شعب جاهل و عبيد البيادة و بتاع

و طبعا اى حد مش موافق على الكلام دة  يكون عميل للجيش أو كلب السلطة أو خائن لبلدة

طيب يبنى براحة يقولك لاااا دة السيسي حيترشح و حايكسب ( نفس الكلام الاهبل الاتقال ساعة شفيق و أنة كسبان كسبان و مرشح المجلس العسكري و بتاع )

و لو السيسي ماترشحش مش حايسكت 

حايقولك أة مانا عارف من الأول أنة مش حيترشح هو بس حايجيب وأحد أراجوز و يحكم هو بردو

و لو ماطلعش الجاى أراجوز بردو حايقولك انا عارف طبعا بس هما من الأول متفقين مع بعض على فكرة

كدة أوفر بصراحة 

و فى ناس تانية ماشية تقولك أة بقى خلاص الحايفتح بقة حانسجنة و نبهدل أمة

كفاية بقى نشطاء و نيلة

كللللهم عملاء عند الأمريكان و إخوان متسترين و خلايا مغمن عليها

وصلت ان وأحد بيحلفلى ان فى شخص من النشطاء دول ماشى بكارنية ال سي اى ايه فى محفظتة (انا بتكلم بجد مش مبالغة)

يلا يا سيسي بهدلهم قطعهم افرمهم و احنا وراك

ولا حملة كمل جميلك و جمع ٢٠ مليون عشان السيسي يكمل جميلة و يبقى رئيس 

انتو بتتكلمو بجد ،،،،،هى جمعية استهلاكية ولا بنت بايرة مش لاقية جواز،،،،،حرام عليكو البلد تعملو فيها كدة،،،

و طبعا فى ناس غاوية أفراح عشان تروح تضرب نار

تلاقى وأحد غريب زى مرتضى منصور طالع بمنتهى السفالة يشتم و يتهم الناس و كللة قاعد يتفرج علية،،،،طيب لية

و تلاقى الناحية التانية واحد أهبل ممسوك فى لجنة و شاتم الظباط و العساكر يروحو عملينلك حملة للإفراج عن الناشط الحر الشجاع 

مش كدة يا جماعة براحة

هدو اللعب شوية من الناحيتين 

كلمة عميل و خائن و ممول و عبيد دة كلام كبير آوى

مش عشان مختلفين فى الرؤيا دة يديك الحق انك تتهم الناس كدة من غير دليل

نفسي نفهم ان العدو المشترك الكلنا اتحدنا عشان نخلص البلد منة لسة مانتهاش

لسة بيحاربنا بطرق كتير باينة و حاجات كتير مش باينة و حنكتشفها بعدين

مبدأ فرق تسد دة أخطر حاجة بتواجهنا دلوقتى

الغريب فى البلد دى ان فى ناس عندها الثورة كمبدأ اهم من البلد

زى ما فى ناس عندها الاستقرار اهم من الحرية و لقمة العيش بتاعت الغلابة

COUP DE PHAROS

Dear world

If u r still considering what happened a few days ago in Egypt is a coup d'état,then think again

Let me take u to a small and meaningful comparison between what happened in Egypt at 25 jan 2011 and 30 June 2013

At 2011 the international media said that millions went to the streets against Mubarak regime...well ok we were millions of course in tahrir Alexandria suez port-said and a few other places...but by any means possible we didn't exceed 4 or 5 mills in the streets

At 2013 ppl went to the streets against the MB in almost every single part of the country and the numbers were just tool big to be counted some reported that this was the biggest human demonstration in the history of mankind , it was estimated to be anywhere between 20 to 33 millions

At 2011 the ppl where asking for a presidential council to rule for a transitional period but what happened was that the SCAF ruled for almost a year and a half before handing the power to an elected president

At 2013 the ppl had no objection that the NEW SCAF will handle the transitional period yet they refused and handed the power to the Supreme Court president the second day they toppled the president 

At 2011 the revolution was ppl against the president the government the police and sometimes against the army itself

At 2013 all of the above has united against the president and his cult 

At 2011 Mubarak's supporters demonstrated a few times then they  gave up to the ppl will and went home with  almost no clashes between the pro and against demonstrators 

At 2013 Morsi's supporters r refusing to go home till now and every day more and more ppl r killed in the clashes between both sides

Well after this small comparison between the 2 REVOLUTIONS if u still think it's a coup d'état just coz America is saying so then u can only blame ur self 

Coz the Egyptians as usual r making history creating new rules in politics even inventing new terminology in the history of the revolutions around the world

As what we did a few days ago is by far not a coup d'état it's a coup all right but it's a coup de Pharos 

يوميات مصرى فى زمن النهضة

صحى المواطن أكس من النوم و كلة نشاط و حيوية عشان يبدأ اليوم من بدرى كدة و يشوف شغلة
قام من السرير لسة حايغسل وشة لقى الكهرباء قطعت
قال معلش حصل خير نلبس على نور ربنا كدة ،،،هو فى أحسن منة يعنى
راح نازل رايح الشغل ،،،يادوبك ساعة فى التانية راحت الكهرباء قطعت بردو طيب نعمل أية داحنا ورانا طلبيات ناس و شغل و مواعيد ،المهم العمال فضلو قاعدين النائم و البيشرب فى سجائر و حاجة آخر قرف ،،،ساعة فى اتنين و راحت الكهرباء رجعة قال كويس نشوف شغلنا يدوبك مافيش تلت ساعات و راحت قطعة تانى راح صاحبنا متعصب و ممشى العمال و قالهم مافيش سهر ولا أوفر تايم النهاردة و خلى المستنى شغلة يستنى بقى
المهم روح المواطن اتغداء و قعد مع العائلة و شوية و راحت الكهرباء قطعة
طيب و بعدين الدنيا حر و الواحد مش مستحمل قالك انا حاقوم أخد دش يمكن يهون الحر شوية
لسة بيفتح الحنفية قالولو فى البيت على فكرة المية مقطوعة من الصبح و الخزان شطب خلاص يعنى مافيش ولا حمام ولا نيلة
اتعصب و اتخانق مع الفى البيت و راح وأخد بعدة و نازل يدوبك شارع فى التانى و لقى السكة واقفة و الناس نازلة من عربيتها و كللة بيسب و بيلعن فنزل سألهم قالهم فى اى يا جماعة ما حد يفهمنى فقالولو فى بنزينة على اول الشارع فيها سولار فالطابور موقف الدنيا هنا و السكة التانية الناس قطعاها احتجاجا على قطع الكهرباء لف وارجع تأنى ياباشا أحسن لك
راح لافف و راجع أخد سكة تانية خالص و هو سائق لقى قدامة فجاءة توكتوك ظهر من شارع جانبي كسر علية و راح خبطلو عربيتة و طلع يجرى
نزل المواطن مش فاهم أية الحصل و مش مجمع اى حاجة لقى العربية متبهدلة من قدام فى معدية ظابط على الموتوسيكل بتاعة فا وقفلة و شاف فى أية و كدة و قالة احمد ربنا انو منزلش اتخانق معاك دى كلها عيال صيع و معاهم سلاح داحنا الضباط بطلنا نتعرضلهم خلاص خد عربيتك و روح احسنلك
مشى المواطن و هو مش مصدق نفسة من كل الأحداث بتاعت اليوم فراح مكلم جماعة أصحابة و شافهم فين و قال أروح اقعد معاهم شوية أهدى أعصابى بدل اليوم المنيل دة
راح قعد معاهم لقاهم كللهم حالهم زى حالة كدة زهقانيين و قارفانيين و البيتكلم على الهجرة و البيتكلم فى السياسة و حاجة آخر قرف
راح وأخد بعضة و ماشى فضل ماشي ماشي مش عارف يروح فين و بعدين افتكر واحد صحبة عزيز علية جداً دائماً كان متفائل دائماً كان فرحان دائماً كان بيسال على الناس كلها و هو بقالة سنتين تقريبا مارحش زارة
طلع بالعربية على اقرب محل ورد جاب بوكية صغير و طلع على صحبة
وصل عندة لقى المكان مهمل و مش نضيف ،،،، راح منضفة شوية و حاطت البوكية و قعد يتكلم مع صاحبة
شفت يا احمد ،،، شفت البلد الانت مت عشانها وصلت لفين مش كنت فضلت وسطنا أحسن بدل ما تستشهد و تسيبنا لوحدنا فى القرف دة
ديما كنت شايف أن فى أمل و بكرة أحسن فى البلد دى دائماً انت الكنت بتهون علينا الدنيا
هما لية دائماً الطيبين هما البيموتو و ولاد الكلب هما البيفضلو عايشين
اهم قتلوك و واخدين البلد و بيغرقوها و كل يوم أسواء من القبلة
نعمل أية احنا دلوقتى يعنى
نمشي و نسيبها ولا نسيبهم يغرقوها كمان و كمان و يبقى دمك راح هدر انت و كل الشباب الزيك
ولا نكمل المعركة و مانسيبهالهمش يبهدلو و يمرمطو ببلادنا الأرض اكتر من كدة
حتعملو أية يا مصريين ،،،،،،،،،

I think I m done...

I think I m done with u Egypt ....

Sorry I really hoped we can go somewhere ...anywhere together 

I had so many plans made for us in the near and far future

But obviously I was wrong

It's not u I swear it's me 

I can not see what ur turning into and stay calm and keep hoping and fooling my self that one day u will go back  to the way u once were 

I can not see u Kneeling like this in front of the ones We once called terrorists and do nothing about it 

I can not see u humiliating and killing and destroying everyone who loves u and try to put u once again on track 

I can not turn my eyes the other way every time innocent ppl r killed or injured by ur neglect-ion and pretend that it will never happen to me

I can not see u destroying ur past and ur future and say that everything will certainly end up fine 

I can not keep living on memories and hopes and dreams    

Of course I will always have my eyes on u and pray for u 

But I'm sorry Egypt

I  really think I'm done   

سيادة الرئيس محمد حسنى مبارك

 سيادة الرئيس محمد حسنى مبارك

أية أخبار معاليك؟؟؟أرجو انك تكون بصحة و سلامة و بتتفرج على البلد و الحصل فى مصر و المصريين ؟؟؟؟

أولا للتوضيح فقط أنا أخاطبك بسيادة الرئيس ليس لحبى لك و لكن لعدم اعترافى بالشخص الاخر الجالس على كرسيك الآن 

ثانيا أنا متأكد أن حضرتك متابع البيحصل فى البلد هذه الأيام من حوادث و انعدام استقرار و الحالة الاقتصادية المنيلة الاحنا فيها

و أكيد حضرتك بيوصلك أن أكثرية الشعب ماشي فى الشارع اليومين دول بيقول ولا يوم من أيامك يا مبارك

و أكيد بردو حضرتك مبسوط من الموضوع دة بس ياريت تسمع وجهة نظرى فى الموضوع مش كامحلل سياسي ولا خبير استرتيجى ولا اى حاجة من الجامدين دول

ولكن كمواطن مصرى متمسك بحقة فى البلد دى و رافض فكرت الهجرة و الهروب و كان و مازال كلى امل انى ممكن اعيش انا و ولادى فى سلام على ارض هذا الوطن 

احب أقول لحضرتك أن ٩٠٪من الحاصل دة انت المسؤول عنة

ايوة انت المسؤول 

طبعا حضرتك اكيد بتسال ازاى يعنى هو أنا العملت الزفت الثورة بتاعتكو دى 

و هنا حفاجاك و ارد على معاليك بكلمة واحدة بس

ايوننننننن

حضرتك السبب الأول و الأقوى و الاوحد لقيام هذه الثورة و نزول على الأقل الأمواج الأولى من الشعب إلى الشوارع

و قبل ما تستغرب آوى من كلامى احب اوضحلك الكلام دة اتبنى على انهو أساس 

أولا حضرتك مشاء اللة قعدت حاكم البلد دى ٣٠ سنة تقدر تقولى عملت أية عشان تطور التعليم فى مصر 

مستوى التعليم كان لسة فى الروح لما حضرتك شرفتنا فى أوئل الثمانينات و نسبة الأمية كانت معقولة نوعا ما و كان فى كتاب و علماء و مثقفين لسة بيطلعو من الشعب 

و لكن إصرارك العجيب على عدم حتى محاولة تطوير المنظومة التعليمية دة من اهم الأسباب للوضع الحالى الوصلتلة البلد

الجهل و الأمية و الشهادات الفاضية الماليين البلد دة خلا الناس ولا تعرف تفكر صح ولا تتصرف صح ولا حتى تختار الناس الصح 

ثانيا تقدر تفهمني حضرتك أية الإصرار الغير مفهوم على عدم ترك كرسي الحكم إلى أن جأ من أطاح بك

دة معاليك لو كنت فكرت بس تعتزل الحكم مثلا بعد حادثة أديس أبابا ولا بعد موت حفيد حضرتك مثلا كان الشعب عملك تمثال واللة على الأقل 

ولا هو يعنى كان التوريث خلاص لازم ولابد منة 

شفت المشي ورا المدام وصلك لحد فين دة لو حضرتك كنت فعلا اعتزلت و تركت الحكم كانو ولاد حضرتك فضلو محتفظين باحترام كل المصريين و مش بعيد كان زود فرص الباشا الصغير لو فكر يخش انتخابات فى المستقبل ولا حاجة

أما ثالث سبب و أهمهم على الإطلاق هو إصرار حضرتك على منع مختلف طبقات و طوائف الشعب من مزاولة العمل السياسي ما عدا هذه الجماعة 

يعنى بالعقل كدة حضرتك مسيطر على عمارة و جايب بلطجى بتخوف بية بقيت السكان و سايب البلطجى دة يتصاحب و يساعد السكان فى كل حاجة

بزمتك مش طبيعى يعنى أنة حيجى وقت يتفق عليك السكان مع البلطجى فا يروحو يخلصو منك و بعدين بقى يروح البلطجى يطيح فى بقيت السكان زى ماهو طايح فى الشعب كللة دلوقتى

يعنى مافيش اى شخص مسموحلة يشتغل سياسة فى البلد على مدار ال ٢٠ سنة الفاتو غير بعض الشخصيات الكرتونية الحضراتكو خلقتوها عشان بس الصورة مايبقاش شكلها وحش يعنى

و فى نفس الوقت سايب الجماعة تسيطر على أغلبية الشعب الغلبان الجاهل و يوزعو عليهم فلوس و تموين و علاج لحد ما بقو هما البديل للحكومة فى كل حاجة 

ماينفعش حضرتك كدة 

حضرتك كدة مسلمنا تسليم أهالي للجماعة

و هو دة الحصل فعلا لولا بس كتر خيرهم هما بداو يخلو الشعب يكرهم خلاص

عمتا كفاية كدة هما مش دول بس الأسباب أكيد فية تانى زى ارتفاع غريب فى الفروقات الطبقية و انهيار المنظومة الصحية و حاجات تانية كتير

طبعا حضرتك مش عاجبك الكلام بتاعى خالص 

و نفسك تقولى انت مين انت أصلا و هو انت فاكر أن شوية العيال النزلو الشوارع هما المشونى و حاجات كتير آوى من الكلام دة

احب أقول لحضرتك أن فعلا شوية العيال مش هما المشوك بس على الأقل وفرو الغطاء الجماهيري قدام العالم للضغط و اللعب الكان بيحصل من تحت الترابيزة

يعنى لو ماكانش العيال دى نزلت أصلا ولا حد كان عرف يكلمك و لا فكر يقلك أمشى

المهم يا رئيس اهو حصل الحصل و ادينا عايشين فى موقف منيل على الآخر سوا بقى كان بسببك أو بسبب حد تانى

أنا عامتا فى الآخر عايز أقولك كلمتين 

أولا لازم تشكر الجماعة لان فى ناس كتير من الكانت بتدعى عليك بقيت بتدعيلك بسبب حكم الجماعة و الشافوة من حكم الجماعة 

ثانيا ربنا يسامحك 

سلام يا رئيس 

محاولة للفهم

طيب و بعدين يعنى مش حاينفع كدة و ربنا

يعنى عاجبكو البيحصل دة 

إحنا كا شعب عمال يتلعب بينا كورة بقالنا اكتر من سنتين و إحنا مش فاهميين حاجة خالص

قال و يقولك النشاط الكروى واقف

واقف ازاى يا عم الأستاذ و إحنا كل الشوية حد يشوطنا يطيرنا فى الهوا و منلاقيش حد يلقفنا واحنا نازليين زى فيلم طيور الظلام كدة فى آخر مشهد 

فى اربع لعيبة فى الملعب بيلعبو بينا و ماحدش قادر يوقفهم عن البيعملوة بقالنا فترة و ماشكلناش حنخش فى اللعبة معاهم

و اللعيبة بالترتيب بحسب قواهم فى رأي المتواضع هم

أمريكا المجلس الأعلى للقوات المسلحة بتشكيلية الإخوان المسلمين و النظام السابق

فا اقل الإيمان أن إحنا نحاول على قد ما نقدر نفهم أية البيحصل نحاول نعرف مين بيشوطنا لمين و عشان أية و لحد امتى المآتش دة حيفضل شغال

لو مسكنا القصة كلها على بعضها من ٢٥ يناير ٢٠١١ لحد النهاردة حنلاقى أن إحنا قدامنا ٣ احتمالات 

الاحتمال الأول أن كل دة تدبير ربنا و إحنا ماشيين بالبركة 

الاحتمال التانى أن كلل البيحصل دة مؤامرة 

الاحتمال التالت أنها ماكنتش مؤامرة بس هى قلبت على مؤامرة فى الآخر

نبدأ بالاحتمال الأول و متبنيين هذا الاحتمال وجهة نظرهم أن الحصل دة من قيام الشعب على الحاكم الظالم حسنى مبارك كان المفروض يحصل من زمان و أن أصلا صمود هذا النظام لمدة ٣٠ سنة هى دى المؤامرة بعينها

حكم ظالم مستبد قمعى قائم على القبضة الأمنية و التخويف و الحبس للمعارضين و حاكم جشع كان ناهب ثروات البلد هو و عيالة و شلتة خصوصا فى العشر سنوات الاخارة 

و أن الشعب خلاص فاض بيه الحال عشان كدة خرج عن الحاكم و رفض اى نوع من الإصلاحات الشكلية و الشعب كللة خرج ليسقطة

و طبعا أصحاب هذا الرأي شايفيين أن النظام السابق هو العقل المدبر لكل المصائب الحلت على البلد من ساعة الثورة من موقعة الجمل لمذبحة بورسعيد لكل المصائب التانية الشفناها فى السنتين الفاتو دول 

و هنا فى نقطيتين أولا ماعدش حد مقتنع آوى بالاحتمال دة غير الناس النزلت الشارع فعلا و شاركت فى الثورة ماهو مش معقول واحد حيقولك أن أنا كنت أداة فى المؤامرة على النظام القديم من غير ما كنت اعرف يعنى من الآخر ماحدش حيطلع يقولك أنا اضحك عليا و ماكنش قصدي (مع أن الموضوع دة بدأنا نسمعة اليومين دول من قوة كان يطلق عليها ثورية سبحان اللة) 

النقطة التانية أن البلد وقعت فعلا اقتصاديا و أمنيا و خلقيا بعد الثورة و دة شيء غريب أنة يحصل مع أن إحنا كنا مقتنعين أن مافيش أسواء من الكنا فية

دة غير أن الشباب الثورى حاول يعمل مع النظام الحالى ما فعلة مع النظام السابق من مظاهرات و مليونيات و اشتباكات مع الشرطة بس يا حرام فوجئوا برد فعل مختلف خالص المرة دى 

مما يدعو إلى الشك هو ازاى الشعب اسقط النظام السابق فى ١٨ يوم و مش قادر على النظام الحالى بقالو شهور 

بس المهم لو الاحتمال دة صح يبقى فى حاجة مهمة جداً لازم نفهمها 

لازم نفهم أن كل القلق و التوتر و المصائب و السقوط البيحصل فى البلد دة نتيجة غباء القوة الحاكمة الآن و أنهم بعنادهم و تصميمهم على تكرار الأخطاء الواحدة تلو الأخرى مافيش أمل آوى فى البلد غير أن زى ما ربنا بلانا بيهم ربنا هو الأكيد حيخلصنا منهم 

امتى بقى و ازاى و على ايد مين دة الاحنا حانعرفة فى المستقبل القريب انشااء اللة  و ليس البعيد 

نيجى للاحتمال التانى و هى نظرية المؤامرة 

و الاحتمال دة قائم على فكرة أن أمريكا و إسرائيل و قطر و الإخوان اتفقو كللهم مع بعض على سقوط نظام مبارك و احلالة بنظام الإخوان المسلمين و أن الموضوع دة بيتحضرلو من فترة و أن التحالف دة هو المسؤول عن كل ما يسمى بالربيع العربي و هدفه كان إحلال الأنظمة الحاكمة العجوزة فى الشرق الأوسط بأنظمة أخرى تدين بكامل ولاءها للأمريكان 

و طبعا متبنيين هذا الاحتمال دول كل ما يسمو بالفلول أو جميع القوة و الناس الكانت عايزة حسنى مبارك يفضل فى الحكم سوا كانو بيحبوة أو مستفيدين منة أو مجرد خائفين من التغير و البيجى من ورا التغيير 

و الاحتمال دة بيقول أن كل المصائب الحصلت فى السنتين الفاتو سببها المتآمرين على النظام السابق 

يعنى موقعة الجمل اتعملت من الإخوان عشان شافو أن الناس كانت بدأت تتعاطف مع مبارك و كانت بدأت الدعوات تعلو لمغادرة الميدان و كفاية كدة حرام سيبو الراجل يكمل الست شهور بتوعة و يتكل على اللة 

و أن بردو الإخوان هم من دبرو موقعة بورسعيد و محمد محمود الأولى  من اجل التعجيل بنهاية حكم العسكر و انتهاء المرحلة الانتقالية

و هنا فى كذا نقطة 

لو الاحتمال دة هو الصح يبقى كلل الاحنا فية دة من خطوات المؤامرة من أجل الوصول لهدف واحد فقط و هو إذلال الشعب المصري و كسرة عشان مايقوملوش قوما تانى

الاحتمال دة مع مرور الوقت بيكتسب شعبية كبيرة و ناس كتير بدأت تقتنع بية بس للأسف لم يظهر اى دليل مادى ملموس على المؤامرة بس أكيد مع مرور الوقت فى حاجات كتير حتبان و تتفهم بس السؤال حنلحق نفهم الموضوع قبل فوات الأوان ولا لا 

نيجى للاحتمال الثالث و دة مايعتبرش احتمال آوى على قد ما يعتبر خيال و هو قائم على مزيج من الاحتمالين السابقين

أن النظام السابق سقط فعلا سوا بفعل المؤامرة أو بفعل الضغط الشعبي

و أن فى ناس من البتحكم البلد ساعتها شافت أن مافيش مانع أن الشعب يجرب و يتعلم

و سابونا نلطش فى السياسة و هما عارفين السيناريو الحيحصل

فاسابو الإخوان يستولو على الحكم و كانو عارفين و متأكدين أنهم حيتالقو فى الفشل و السقوط السريع بالبلد

و فى ساعة حاسمة معينة سيتحرك هذا التنظيم لتخليص البلاد من الإخوان و حكمهم و يظهر للشعب فى صورة المنقذ الوفى لشعبة و فى نفس الوقت ستنتهى أسطورة الإخوان المسلمين نهائيا من الوجود مش فى مصر بس بل فى العالم كللة

و أظن أن كلنا شايفيين كالبيحصل فى البلد من ارتفاع رهيب فى نغمة ولا يوم من أيامك يا مبارك و التوكيلات الشغالة للفريق السيسي و التحسر العنيف على حال البلد فى زمن الإخوان لدرجة أن معظم من كانو فى صف الإخوان فى انتخابات الرياسة أن لم يكن كللهم طلعو و اعتذرو للشعب على سوء اختيارهم 

و الاحتمال دة يخلينا قاعديين مستنيين بقى اللحظة الحاسمة لتحرك القوة الخفية و نعقد آمالنا عليهم و نقول يارب

فى الثلاث احتمالات الفوق إحنا مافيش فى أيدينا حاجة تتعمل آوى

فا حنرجع لدورنا البنلعبة بقالنا سنتين تقريبا و هو دور الكورة البيتلعب بيها و هى مش فاهمة حاجة لان عادى جداً أن يطلع الكلام دة كللة خيال مريض و أن البيحصل حاجة تانية خالص و عمرنا ما حنعرفها

واللة اعلم

عن صندوقين أتحدث

عن صندوقين أتحدث 

الفرق في الحجم مش كبير أوي بس الفرق في المضمون رهيب

صندوق بيشيل جواة أمل و فرحة اب و أم و بيدفونهم فى التراب

و صندوق بيحدد مصير بلد و شعب و مستقبله 

صندوق بنستقبله بصويت و دموع و حسرة و صدمة

و صندوق بيستقبلوه بالتصويت و الزيت و السكر و اللحمة

صندوق بيحمل كل معاني النبل و التضحية و الإخلاص

و صندوق جواه كل الطمع و الوساخة و الخيانة 

صندوق صاحبة ماكانش نفسه فى حاجة غير انو يشوف بكره أحلى

و صندوق صاحبه بيعمل كل حاجه عشان يسرق بكره منى و منك

صندوق بيوصل صاحبه لاعلى درجات السماء و هى الشهادة

و صندوق بيوصل صاحبة للشرعية المزورة البيدور عليها 

زمان كنا بنقول لازم عشان نشوف الصندوق الصغير و نزاهته نملا الصناديق الكبيرة بخيرة شبابنا و اشرفهم

ولكن الكلام طلع أوهام

لسة بنحط شبابنا فى الصناديق و هما مش هاممهم غير صنداقيهم

لو وصلت يحطونا كلللنا فى الصناديق عشان بس يوصلو لصنداقيهم مش حيترددو

خدو صناديقو اعملو الانتو عايزينو بس سيبو عيالنا على رجليهم و كفاية تملو فى صناديقنا

يارب ارحمنا جميعاااا

انتهاء الدرس يا .....

وانا بتفرج على عمرو اديب امبارح لقيتة بيسخن بطريقتة المعتادة الجيش على الاخوان المسلمين و بيقول كلام طبعا هو قاصد بية حاجة تانية خالص
بس الراجل اتكلم فى نقطة مهمة جداا جماعة الاخوان المسلمين من بدا الثورة لم تخسر معركة واحدة بل بالعكس دى كسبت كل المعارك الدخليتها مع جميع الأطراف يمكن هى مرة واحدة بس الكانو بداو فى الخسارة لكن سرعان ما تم قلب الطاولة لمصلحتهم  تانى
طبعا دى مش سياسية دة استهبال مافيش حاجة فى السياسة اسمها تكسب على طول كدة 
تعالو ناخدها من الاول كدة و واحدة واحدة يمكن نفهم اية سر قوة هذة الجماعة

المعركة الاولى كانت فى بدايات الثورة بعد الخطاب العاطفى للمتنحى مبارك كان فى ناس كتير بدات تقتنع ان كدة كفاية و خلاص بقى نروح و نسيب الراجل يكمل و يعمل الإصلاحات بس الجماعة كانت عارفة انهم اول من سيدفع الثمن و حيشيلو الفاتورة لوحدهم تقريبا فكانت موقعة الجمل الليلية و النتيجة ان الناس كلها وقفت جنبهم بالمطالبة بالتنحى و كسبو المعركة فى الاخر

المعركة التانية كانت بتاعت الدستور اولا لما كانت الجماعة مصممة على الانتخابات اولا قبل الدستور و قبل كل حاجة عشان عارفيين انهم القوة الوحيدة على الارض الشبة مستعدة للانتخابات و بالفعل وحدت قوتها مع جميع القوة الاسلامية فى الشارع و بداو فى اللعب على الحرام و الحلال و الجنة و النار و الكلام دة فاكتسحو الاستفتاء و اكتسحو الانتخابات البرلمانية بمساعدة القوة الاسلامية 

المعركة التالتة و كانت معركة الرئاسة قالك مش حننزل و بعدين قالك المشهد يتحتم علينا النزول و دخل الشاطر و طلع الشاطر و دخل الاستبن كل دة اضعف موقفهم شوية فكانت نتيجة المرحلة الاولى صادمة ليهم شوية من ضعف الفارق بينهم و بين الباقى فاكالعادة اتحدت مع جميع القوة المسماة بالثورية و القوة الاسلامية على اساس ان الثورة ضد الفلول و الوعود الكثيرة و كلام كبير اوى و بالفعل كسبو المعركة دى كمان 

المعركة الرابعة و كانت بخصوص المجلس الاعلى للقوات المسلحة بس اعتقد ان إحنا مش حنوصل لتفاصيل الموضوع دة كللها غير بعد وقت بس النتيجة كانت كالعادة النتيجة بتاعت كل مرة اقالو اكبر رأسين فى المجلس و عينو مكانهم الراجل الماما امريكا قالت علية 

المعركة الخامسة كانت بخصوص مجلس الشعب لما اتاخدو على خوانة من غير استعداد فا ماعرفوش يتصرفو بسرعة و اتحل المجلس و لكنهم ضربو بجميع القوانين و إرادة الناس عرض الحائط و وقفو يحمو مجلس الشورى بتاعهم بكل قوتهم و و فى نفس المعركة دى كان الاعلان الدستورى العجيب بس دا كان مجرد أداة لكسب المعركة الاساسية بتاعت المجلس و بتاعت الجمعية التأسيسية للدستور  
بالفعل كالعادة طلعو كسبانيين من المعركة دى و احتفظو بالمجلس و شرعييتة و عرفو يعدو بالدستور بتاعهم 

المعركة السادسة بتاعت النائب العام لما بداو يلعبوها لقو فجأة كل الناس ضدهم و لقو مقاومة عجيبة من جميع الأطراف و خصوصا صاحب القضية نفسها فبداو فى التراجع و دراسة الموضوع من ناحية تانية ثم قامو بهجمة خاطفة بعد تنويم الناس و عرفو يفلتو بالنائب العام الخصوصى بتاعهم 

ست معارك و النتيجة واحدة و لكن البعض يقول ان الحرب لم تنتهى بعد
نيجى لشوية ملاحاظات نقدر نستخلصها من اللك دة كلة يمكن تنفعنا فى حاجة فى المعارك القادمة مع هذة الجماعة 
الناس دى بتستعمل فى معظم معاركها سلاح واحد و هو البحث عن طرف قوى اخر و اقناعة و خداعة بان مصلحتهم واحدة و يتم استغلالهم و استغلال اتباعهم للوصول للنتيجة المرجوة و فى الاغلب بعد المعركة الطرف الاخر بيكتشف الخدعة بس بتبقى خلاص فات الميعاد
السلاح دة بدا يفقد مفعولة مش عشان الناس بدات تفهم مثلا لا خالص بس عشان هما استغلو معظم الناس خلاص و مش فاضلهم غير شوية قوة غير مؤثرة زى حزب الوسط الرقاصة و شوية كيانات صغيرة كدة 
اما السلاح التانى او السبب التانى دائماً بيبقى ان الطرف التانى غبى ضعيف جبان بيلعب بالقوانيين و عمرة ما بيفكر يغير اسلوبة و يتحايل على القانون زييهم  و كل مرة بياخد على قفاة و يقول كماان
نيجى لأهم سبب و أقوى طرف فى المعادلة دى الشعب و بالبلدى كدة الناس المصريين العايشين فى البلد دى و دول بطبعهم طيبيين غلابة كدة و فى حالهم مابيحبوش التغيير عشان مش عارفيين ممكن يجيب اية و اكبر دليل انهم استحملو مبارك ٣٠ سنة فا ماعندهمش مشكلة ان البيحكم يفضل يحكم بس ماتوجعوش دماغة بس طبعا الكلام دة كللة بيتغير اول ما تيجى تقرب من قوتة اليومى و أظن كلنا حاسيين ان الشعب بدا يجوع فعلا و يزهق خلاص 

و بكدة نقدر نقول ان المعركة الجاية بتاعت مجلس الشعب مهمة جداً مش عشان لو كسبوها بردو حيبقى فى الاغلب انتهت الحرب و لكن عشان لو فى اى نتيجة تانية حصلت حتى لو كانت تعادل حنقدر نقول ان الناس بدات تفهم اللعبة صح و حتبقى رسالة قوية الى الجماعة من كل الناس معارضة و شعب و كللة رسالة مضمونها حاجة واحدة بس
انتهاء الدرس يا غبى