٢٠١٢...........١٩٤٠

٢٠١٢...........١٩٤٠

انا شاب فى منتصف الثلاثينات يعنى مش قديم اوى بس طول عمرى بقرا كتير عن مصر زمان و بتفرج على افلام ابيض و اسود كتير و بردة باسمع من جدتى و امى عن ايام زمان و حالاوت زمان
المهم من كام يوم وانا فى الشارع و بتفرج على الشعب المصرى و الشارع و كدة لقيتنى بقول فى سرى يا سلااام لو نرجع بالبلد ٦٠ او ٧٠ سنة كدة و نعيش زى ماكانو أجدادنا عايشين
يا نهااار اسود بقى العالم كلة عمال يتقدم و يتطور و يقفز و انا اقسي أمنياتى اننا نرجع للخلف و كمان ٦٠ ولا ٧٠ سنة
للأسف اييوة دة اقصى امنياتى
اقصى امنياتى اننا نرجع نعيش فى شوارع نظيفة شكلها حلو متخططة فاضية شوية زى ما بنشوف فى الصور و الأفلام الابيض و اسود دة إحنا كان اسمنا باريس الشرق يا إخواننا
دى محلتنا كان انضف من محلات اوروبا نفسها (ماهى امريكا ساعتها ماكنتش امللة اصلا)
اقصي امنياتى ان بلدنا ترجع بلد محترمة و المصرى شكلة نضيف  زى زمان كللة لابس بدلة و ماشى محترم و فى حالة و شكلة مستحمى
الستات و البنات ماشيين فى الشارع لابسين الهما عايزينة (مش لازم مايوة يعنى) من غير ما يخافو حد يضايقهم او يمد ايدة
اقصى امنياتى اننا نرجع شعب بيبتسم فى وش بعض و بنضحك و بنقول صباح الخير و مساء الخير و الحاجات البقي من النادر انك تسمعها دلوقتى زى أسف حقك عليا اتفضلللل كدى يعنى
ان الفصول تبقى آدمية و جامعة القاهرة ترجع لمكانتها العلمية الكانت علية
طبعا مش حقولك بقى تنزل بجنية تشتريلك اكل السنة كلها ولا ان الجنية المصرى اصلا كان قيمتة جنية دهب (الهو ب ٢٦٠٠ جنية دلوقتى) ولا الكلام الخزعبلى دة لأنة ببساطة مسسسستحيل
طبعا دلوقتى فى خناقة فى دماغى مين السبب فالحنا وصلنالة دة
الحيقولك الملك الفاسد و الحيقول اللة يسامحة عبد الناصر و الحيقول السادات هو السبب و المقتنع ان مبارك قضى علينا
و الغاوى نظرية المقامرة ممكن يقولك من ساعات ما ولاد الكلب الاسرائليين جم جانبنا و إحنا حالنا متنيل على طول
انا عن نفسي مش شايف ان السبب مهم
المهم ان انا اقصى امنياتى اننا نرجع ٦٠ سنة للوراء
تفتكر نقدر ..........

على فين يا ام البلاد

على فين يا ام البلاد واخدانا
على استقرار ولا عمار ولا على حرب صعرانا

خوفى عليكى يا بلدى مالوش حدود و نهاية
بس حزنى على الشهيد بيحرق قلبى جوايا      

هو يا زل و ماهانا و استبداد
يا نموت بالغاز فالاعتصامات

ربك كريم يناجنيا
من كل نفس خسيسة
 عايز يحكم و خلاص  

الثورة.....تبديل لا إصلاح

الثورة ....تبديل لا إصلاح

و عملنا ثورة، ثورة عظيمة أكيد و فى ناس مختلفة معاها بردة بس للأسف مع مرور الوقت المعترضين على الثورة بيزيدو حتى وصلنا ان فى ناس سمتها نكسة ٢٥ يناير
المهم عملنا الثورة و نجحت نجاح ساحق حتى اشد المتفائليين عمرة ما كان يتخيل انها ممكن توصل للدرجة دى
فى حاجات كتير لسة مش مفهومة و مالهاش تفسير و شكلنا مش حنفهمها فى القريب العاجل
منها غباء النظام السابق فى التعامل ،سرعة سقوطة ،موقعة الجمل آلهى السبب الريئسي و النهائي لسقوط مبارك ،عدم هروب مبارك نفسة هو و جماعاتة كاملة مع ان كان فى عروض كتير من دول الجوار ......غريبة مش كدة
المهم بعد سنة و نص تقريبا او اكتر من نجاح الثورة تعالو نستعرض بعض  النتائج
 التغير الاول و فى نظرى بصراحة التغير الأوحد فى مصر هو ان إحنا بدلنا المجموعة الحاكمة بمجموعة حاكمة تانية
يعنى إحنا كان بيحكمنا مجموعة من الاشخاص متفقين مع بعض و مقاسمنها ما بينهم و كل واحد لية اختصاصاته
المفروض ان المجموعة دى كان ولائها لبعض او ولائها للحزب الحاكم الهوا الحزب الوطنى الديمقراطي
يعنى عندك علاء و عز و شلتهم ماسكين البيزنس ،جمال واخد السياسة صفوت و سرور و بقيت الشلة شماشًرجية للباقى و كدة يعنى
بس الواقع ان كان ولائهم للفلوس ،الفلوس و بس يعنى كان ممكن اى واحد معاة شوية فلوس يشتري طريقة جواهم و يخش يلعب وسطهم
و لو حسلك اى مشكلة مع حد فيهم ممكن تتوسط عند اى حد تانى و بقرشين تخلص نفسك
و طول ما انت مش مضايقهم هما سايبينك تشتغل و تعيش
نيجى بقى للنظام الجديد الثورى البيعبر عن نبض الشعب
نفس النظام نفس السياسة نفس التقسيم
البيزنس ماسكو مجموعة بقيادة طبعا البشاوات حسن مالك و خيرت الشاطر نفس السفريات و العقود البتتمضاء برة فى وجود وفد متنقى على الفرازة حتى جمعية جمال مبارك لرجال الاعمال تم استنساخها بجمعية أبدا
طبعا فتحى سرور بديلة واضح و صريح دة حتى عشان مانحسش بالغربة جابولنا واحد شبهة ههه طخين و قصير و بكرش الباشا الكتاتنى بتاع العضو المحترم يتفضل يقف
اما باقى الطقم صفوت و فاروق حسنى و كمال الشازلى (اللة يرحمة) حنلاقى بديل لكل واحد فيهم تقريبا من صفوة رجال الاخوان ....العريان ابو بركة البلتاجى .....ماشاللة على الاستنساخ
دة حتى حسنى فى اواخر ايامة كان هو فى القصر و جمال و سوزان هما البيحكمة
و دلوقتى مرسي فى القصر و الباشا المرشد هو البيحكم
المشكلة بقى و الخطير فى الموضوع دة ان المجموعة الحاكمة الان فعلا فعلا ولائها الوحيد للجماعة و لأفراد الجماعة بس يعنى لو مش منهم يبقى هارد لاك و لو حاولت تخش وسطهم حتى حيبقى قداامك كتيير عشان تبقى بين الصفوة
يعنى حتى الفلوس مش حاتنفعك دة لو انت من الصفوة المعاهم فلوس اصلا
اما لو حاولت تقف قدامهم فهنا ممكن نشوف اختلاف النظام القديم كان بيستعمل العنف و الداخلية و القانون عشان يربيك لكن دول عنندهم الأقوى من دة كلة ،عندهم الدين يعنى لو بتهاجمهم يبقى مش عاجبك الدين  و اسهل حاجة ان يتم تكفيرك
و فى المجتمع الاحنا عايشين فية دة لو حد كفرك كأنك لبست ١٠٠ قضية آداب مثلا و دور بقى مين حيصدقك تانى
يعنى و من الاخر
الحال هو الحال ان ماكنش اصعب و كالعادة
لا عزاء للمصريين

فى ناس مش عايشة

كل يوم تقريبا بشوف  فى الشارع مناظر تقطع القلب
ولد صغير وشة زى القمر بياكل من الزبالة
ست كبيرة شايلة حجات كتير بالعافية مش قادرة تمشى عشان لازم توصلها
راجل نايم عالرصيف مافيش حاجة مغاطياه غير هدومة المقطعة
و برجع بعد كدة اسمع الناس و التلفزيون و المصريين كلهم بيتكلمو فى عالم تانى خالص
مبارك الانتخابات شفيق الاخوان الدستور العزل التحرير
ساعتها بفهم حاجات يمكن غائبة عن ناس كتير
بفهم ان الناس دول قدامهم على الاقل ٥٠ سنة عشان حد يفكر فيهم و انا كدة متفائل
بفهم ان المصريين فى وأدى و الناس دى فى وأدى تانى خالص
بفهم ان إحنا شعب اقل ما يوصف  أنانى جداً
بفهم ان الناس دى مش فارقة معاها إحنا بننتخب مين و لية ولا إحنا بنهبب اية اصلا
بفهم ان الناس دى من حقها تقوم علينا تأكلنا حتى و مايبقوش غلطانين
بفهم ان طالما عندك بيت تروح لية و حد يبص فى وشك لما تروح و سرير تنام علية لازم فى كل  ساعة من اليوم تقول الحمدللة
Thank you lord
Help them lord

عينى عليكى يا بلد

عيني عليكي يا بلد يالي مش لاحقة تفوقي
كل ما تفتحي عنيكي ولادك يدهسوكي
دول بلطجية و دول حرامية و دول فاسدين
و البيهدمو و البيقتلو باسم الدين
و كان مافيش غيرهم فالبلد مؤمنين


عيني عليكي يا بلد و انت بتتسرقي من سنين
     فلوس و ارض و اثار حتي الغاز يا نصابين
  و بقيتة من الأغنياء وانتو  اصلا شحاتين.                                                          
     و كل دى فلوس الغلابة و من قوت المصريين
   و كمان عايزين يورثوكى و احنا بس نقول امين


 كانو فاكرنا صنم ولا بنحس ولا لينا امل فى جديد
  تهياهلهم بالغلط انهم قتلو فينا الحياة و ردينا بالحضيض.  
 تلعو الشباب فى الميدان و عرفو انهم غالطاني
 شباب وحوش متسلحيين بالفيسبوك و التويتر و البي بي
       و عملو ثورة في الميدان و اتولد الأمل فى بكرة جديد

الطبخة العصرية للثورة المصرية

الطبخة العصرية للثورة المصرية
20 % شباب ثورة
و دة حتلاقية فى حتت كتير بس احسن صنف موجود فى سوبر ماركت خالد سعيد و سخنية على نار هادية لمدة 5 او 6 سنين
30% بلطجية و عيال البها ميت
و دول فيهم نوعين نوع اسمة فلول مالكيش دعوة بى عشان بيبوز الطبخة و نوع تانى حتلاقية متلاءح فى الشوارع جعان و عريان و مش فارقة معاه اى حاجة فى عيشتة و نفسة يموت اصلا
10% ناس مش فاهمة حاجة
و دول بتحتيهم عشان يتفرجو بس هما عايزين يتصورو و يتلعو فى التلفزيون و خلاص
20% اخوان مسلمين
و دول ما تحتيهمش غير لما تبىء متاكدة 100% ان الطبخة حتنجح عشان لو حاسو انها حتبوز حينطو من الطبق و ممكن يدلوقة كمان لو فى مصلحتهم

5% اجندات
و دى متوفرة بشدة فى الشوارع فى الامريكانى و الايرانى و الاسراءيلى و يفضل تمزجى بينهم عشان طعمهم مايبنش اوى
10% غباء من النظام السابق
و دة مكون اساسى فى الطبخة و لازم يتواجد بشدة و كل ما زاد الغباء كل ما استوت الطبخة اسرع و بقى شكلها احلى
5% احزاب و سياسيين
و دول بقى بتحتيهم فى الاخر عشان التزويق بس و ممكن تستغنى عنهم كمان مش مهمين خالص
تحتى كل المكونات على بعض و تقلبى كويس اوى و تحتيهم فى الفرن لمدة شهر كدة بس تم ملاحظة انك مهما قلبتى دايما ال20% بتوع الاخوان هما البيطلعو على الوش اول ما الطبخة تجهز
يتم تقديمها باردة بس خلى بالك انها ممكن ما تبردش لمدة 7 او 8 شهور حتى
و بالهنا و الشفى
By R M

نسيج واحد (تمت كتابة هذى السطور قبل الثورة بشهر )

لمازا تركتوهم.


لمازا تركتوهم يفعلون هذا ببلدى ,بلدى التى كانت تتبع القول الماثور (لا يوجد فرق بين مسلم و مسيحي ),كانت تتبع هذا القول لا ترددة لانة واقع و الواقع لا يحتاج لاحد ان يرددة
انا شاب فى بداية الثلاثينات من عمرى لم احضر الزمن الجميل هذا و لكننى سمعت عنة الكثير و لكننى بكل اسفا اعيش فى هذا الزمن و هذا هو تصورى لواقعنا الحالى المرير .
فى اوئل الثمانينات حينما احكم سعادة الرئيس محمد حسنى مبارك قبضتة على الحكم بشتى الطرق و بقبضة من حديد ايقنت جماعة الاخوان المسلمين انهم لن يستطيعو حكم هذى البلاد و تغير نظامها الا بتغير شعبها و هذا تطلب منهم دهاء و صبر يحسدون عليه .

و لسبب ما تخيل النظام الحاكم انهم تخلو عن طمعهم فى الحكم فتركوهم يغيرون و يلعبون فى ثقافت و فكر المجتمع المصرى باكملة دون تدخل او مراقبة منهم نهائيا فكانهم اعطوهم موافقتهم و مباركتهم لبداية خطتهم و حملتهم لتغير و العبث فى المجتمع المصرى باكملة .

فانطلقت هذى الحملة التى انقسمت الى عدة افرع منها الظاهر و منها الخفى الذى لم و لن يعلن نهائيا .

فاصبحنا نرى اشياء جديدة فى مجتمعنا و شوارعنا ,ملصقات فى الشوارع فى كل مكان عبارات مكتوبة فى شوارعنا كلها كلاما جديدا علينا يتردد على السنة مجموعة من الناس عددها ليس بقليل و كما قال المثل المصري الاصيل (الزن على الودان امر من السحر)
كما تغلغلت الجماعة فى الطبقة المطحونة و هى كما نعلم جميعا الاغلبية العظمى فى مصر و بدات فى مساعدة الفقراء و تحسين مستواهم و توفير وظائف لبعض منهم
 و فى اقل من ثلاثين عاما نجحو فى ذلك
نعم نجحو فى تغير المجتمع المصرى او على اقل تقدير نجحوا فى تغير معظم المجتمع المصرى
و ظواهر هذا النجاح اصبحت موجودة و منتشرة فى شوارعنا و مجتمعنا بشدة و اصبحنا نرى و نسمع هذة الظواهر و نتعامل معها كامر واقع
فنرى الحجاب الان اصبح ظاهرة اجتماعية و ليست دينية ,فكل من ترتدية فهية اخت فاضلة مؤمنة و من لا ترتدية فهيا اذن ليست فاضلة او الاحتمال الاخر ان تكون مسيحية و هيا ليست فاضلة بالمرة ,انا اعلم عدد من المسيحيات فى المناطق الشعبية  يضطرن ان يضعو الايشارب على شعرهن  اتقاءن شر بعض الكلام الذى هم فى غنى عنة
و نرى ايضا اختفاء بعض الكلمات مثل صباح الخير مساء الخير و ايضا اللو فاصبحت هذى الكلمات بدعة و كل بدعة ضلالة و كل ضلالة من الشيطان
و حلت مكان كل هذة الكلمات كلمة واحدة السلام عليكم فاذا قابلت شخص ما فى الشارع او تكلمت مع احد فى الهاتف و قلت لة مثلا صباح الخير او مثلا اللو فكانك هؤا غير موجود فلا يجيب عليك اصلا او الاحتمال الاخر ان يجيبك بما يريد فانت تقول لة مثلا صباح الخير فيجيب عليكم السلام و رحمة اللة و براكتة و كان هذة الكلمات المستعملة فى العالم اجمع يجب ان تختفى من قاموسنا العربى بالتى هى احسن

اما الاخطر من هذا و ذاك فهو الفرق

الفرق الذى ظهر فجاة بين المسلمين و المسيحين و كانهم ادركو فجاة انهم ليسو اخوا و لا حتى ولاد عم و لا نسيج واحد ولا اى حاجة

فاصبح الدين هى الصفة الاولى و الاساسية للشخص ,فكام من مرة سمعنا مذيع يحتفى  بعالم او لاعب او ممثل فيقدمة بالعالم المسلم المصرى ,اذن فالدين اول و اهم صفة للشخص و كم من مرة سمعناهم يقولون مثلا كيف تسرق من اخوك المسلم او كيف تاذى اخوك المسلم هكذا و كان السرقة او الاذى لغير المسلم مبررة او مقبولة ,و ايضا كم مرة سمعناهم يقولون هذا التاجر امين مع انة مسيحى او هذا الدكتور شاطر مع انة مسيحى

هكذا اصبح حالنا فى المجتمع المصرى ,الدين صفة و اهم صفة تفرق بين الجار و الجار ,بين البائع و المشترى بين كل من هو مسلم و غير .

من الممكن جدا ان اكون شخص واحد فقط من بين الملايين من سكان مصر الذى يرى الصورة السوداء و لكن اذا لم اكن وحيدا فيجب ان نبدا ان ندرس و نتصدى لهذة الظواهر و لو حتى كنا متاخرين عشرون سنة و لكن يجب ان نبدا ,يجب ان نعرف لماذا تركوهم يقسموننا لماذا تركوهم يعبثون و يغيرون شعب مصر الجميل الطيب, لماذ ؟؟؟

ربما او امل انهم لم و لن يحكمو هذى البلاد العظيمة و لكنهم بكل اسف تحكم فى الشعب الطيب

ربما لن نتحول الى دولة دينية و لكننا بكل معنى للكلمة تحولنا الى مجتمع دينى

لماذا تركتوهم يقسمون بيننا و يغيروننا هكذا و انتم اول من سيدفع الثمن غاليا و غاليا جدا


لماذا؟؟؟