ما بين ٢٠١١ و ٢٠١٣

ما بين ٢٠١١ و ٢٠١٣

ما بين السنتين دول حاجات كتير اتغيرت

الناس يا حرام فاهمة ان الضغط الشعبى و المظاهرات الحصلت فى ٢٠١١ هى الاجبرت حسنى مبارك أنة يتنحى و يسيب الحكم

فاهمين ان المظاهرات و الناس الماتو و انسحاب الداخلية هو الخلا النظام القديم أنة يسقط بالسرعة دى فى ١٨ يوم بس و مش فاهميين ان فى عوامل كتير اوى كانت السبب فى السقوط

السريع دة

نيجى للعامل الاول و الأهم الغباء الاتعامل بية مع الموضوع و الخضوع السريع للمطالب و الخلا الأطراف كلها تشم ريحة الدم و تتعطش اكثر للمزيد

للعامل التانى السياسة القذرة الكانت بتتلعب ما بين نظام مبارك و نظام المرشد و الصفاقات و الاتفاقيات اللحد دلوقتى إحنا الشعب مايعرفش نصها حتى

العامل التالت و الأهم فى المعادلة كلها الجيش،الجيش كان اصلا مش موافق على موضوع التوريث و كان فى تفكير من داخل القوات المسلحة بالتحرك ضد النظام فى حالة تطبيق التوريث فعليا بس كان فى قلق و معارضة من النزول للشارع من غير تغطية كافية

عشان كدة مع بدايات الخروج الشعبى و بعد ايام قليلة جداا اجتمع المجلس الاعلى للقوات المسلحة بكامل هيئتة من غير الرئيس و دة فى حد ذاتة كان يعتبر انقلاب على الرئيس

العامل الرابع و المهم جداً الضغط الخارجة على النظام من جميع دول اوروبا و أمريكا و دة موضوع يطول شرحة و أسبابة بس كان من اهم الحاجات العجلت بانتهاء حكم حسنى مبارك خصوصا بعد موقعة الجمل الليلية و سقوط بعض القتلى

اخررررر عامل خالص بقى الضغط الشعبى و المظاهرات و الحركة الشبابية الكانو مجرد غطاء لكل الناس البتلعب من تحت الترابيزة مش اكتر من كدة

اية بقى مناسبة الكلام دة كللة فى الوقت دة و بعد مرور اكتر من سنتين على الثورة

المناسبة بقى يا ولاد عشان الضغط الشعبى الان اكتر بكتير من ايام مبارك و كم القتلى البيتساقطو بردة عدد الكبير بس الفرق ما بين السنتين كبير

مافيش موقعة جمل حتتعمل عشان مافيش حد تفكيرة حيجيبة لكدة (و دة يخلينا نتساءل مين العملها اصلا و مين اكتر ناس استفادو منها )

مافيش ضغط خارجى لان المفروض ان النظام جا بانتخابات ضيمقراطية و لان الأمريكان لسة مقتنعين ان مصلحتهم معاهم (بس فى الاغلب دة قرب يتغير )

مافيش حد على الساحة يقدر يلعب ولا يرضى يلعب مع النظام الحالى سياسة لانعدام الثقة فيهم و انعدام وزن المعرضة فى نفس الوقت

مافيش جيش ناوى ينزل الشارع عشان النظام الحالى هو الوحيد القدر يطمنهم من ناحية قيادتهم القديمة و الأهم من ناحية اقتصاد القوات المسلحة المنفصل عن اقتصاد البلد

و بحدة نقدر نفهم ان ولا مليون مظاهرة و لا عشرات الآلاف من القتلى حيحركو الاخوان من على الكرسي الان

إحنا محتاجيين معجزة للتخلص منهم

و للأسف زمن المعجزات انتهى يا عزيزى 

هى زعلانة مننا ليية

هى زعلانة مننا لية

تعالو نسرح بخيالنا كدة بعيد و نخش فى عالم اللا وعى شوية

ماتخفش مش حسرح بيك اوى و كمان يعنى هو إحنا عاجبنا اوى الواقع عشان نخاف نعيش فى الخيال شوية

المهم تعالى معايا كدة شوية و تخيل معايا لو مصر دة كيان بيتكلم و بيحس و كدة

عايز تتخيلو ست بقى راجل او اى حاجة تانية مش مهم المهم انك تتخيل كيان تعرف تكلمو و خلاص

قاعد معاها لوحدكو و لقيتها زعلانة حزينة وخدة جنب كدة و مش بتكلم حد و كل شوية تبص فى السما و تتنهد تنهيدة جامدة كدة تقطع القلب

مالك يا مصر بس ايية المزعلك كدة ممكن تقوليلى؟؟؟

انت مش شايف حالى و حال عيالى عامل ازاى ؟؟؟؟عجبك كدة يعنى إلانا فية دة ؟؟؟

طيب و اية المشكلة يا مصر ...انتى مش أخيرا و بعد ٣٠ سنة من حكم الديكتاتور مبارك خلصتى منة و بقيتى حرة دلوقتى ؟؟؟

يعنى انت عاجبك الحاكمنى دلوقتى ؟؟؟عاجبك البيعملو فيا ؟؟؟

لا ماعلش مش فاهم ؟؟؟اشرحيلى اكتر ؟؟مش هما دول الاخترهم ولادك انهم يحكموكى زعلانة لية بقى دلوقتى ؟؟؟

حقولك اية بس و اشرحلك اية يعنى هو حظى فى الدنيا كدة على طول قليل

يابنى انا اعظم و اقدم من كل البلاد الحوليا ماينفعش البتعملوة فيا دة

يعنى واحد يفضل حاكمنى بقالو ٣٠ سنة ولا فكر يطورنى ولا يعمل اى حاجة غير لما يعمل منها مصلحة او سبوبة و بعدين يطلعو الشباب و يعملو الثورة الجميلة دى و فى الاخر بردو انا حالى يفضل زى ما هو من غير تغير خاالص !!!!بل بالعكس دة انا حالى بيتنيل اكتر و اكتر حراااام عليكو انا مش حمل البهدلة البهدلة دى

يعنى نعمل ثورة و تموت عيالى اقول معلش اهم ولادى و نفسهم يشوفونى فى احسن حال و بيضحو بنفسهم عشانى و خلاص بقى خلصنا و حتفوقولى شوية بقى و حارجع تانى زى زمان واحدة من اعظم دول العالم

وانا فى عز فرحتى الاقى الناس بتتخانق مع بعض مين يحكمنى الكام سنة الجايين

و بعد ما يتخانقو يروحو سيبنلى فى الاخر لاتنين أنيل من بعض

و فى الاخر يجيبولى الراجل ابو دقن دة عشان يحكمنى

ارجع اقول حصل خير ..و مالة يمكن يطلع فى ايدة هو و جماعتة الشفا

يدوبك و انا لسة حادعيلة تروح العيال الفى الجيش مقتولين

و بعديها عينك ماتشوف الا النور .....مصايب مصايب و عيال بتموت و اقتصاد يتهبب وكل مصيبة بيعملوها فى الحكم تيجى على دماغى انا و حالى عمال يتنيل يوم بعض يوم و باردو ماحدش واخد بالة منى انا

كل واحد فيكو بيدور على مصلحتة

الفى الحكم بيدور يقعد أطول فترة ازاى و الفى المعارضة عايز يوصل الحكم و خلاص و اهالى عايزة تاخد بحق عيالها و الجيش بيدور على مصلحتة فين و خلاص

هاا بقى قولى انت عاجبك حالى دلوقتى ؟؟؟؟يرضيك إلانا بقيت فية دة ؟؟؟؟؟

معلش يا مصر ماتزعليش مننا ...أكيد شوية وحنفوقلك و كلنا حتبقى تحت أمرك ....ماتخافيش

 امتى بس يابنى انا مافضلش فيا قوة كتير انا قربت اخلص خلاص

كل فترة بتحصل مصيبة اقول يمكن دى تفاوكو و بردو مافيش فايدة مش عايزين تفوقو اعملكو اية بس لا وأية كل ما يحصل حاجة الاقى الناس يتمشى من عندى و تروح للبلاد التانية بزززمتك ينفع كدة ...

بص يابنى انا ححملك رسالة توصلها للولاد تقدر؟؟؟

انا تحت أمرك ...قوليلى عايزة اية وانا اعملو على طول

انا مش عايزة حاجة خاالص غير بس أنكو تفوقو... تبصولى شوية بعين الرأفة ...انا ماقلتش تنسو نفسكو خاالص لا بس زى ما بتعملو لنفسكو افتكرونى ...حاولو تعملولى فى حاجة عشان حالى يتحسن شوية عشان دة لو ماحصلش قريب انا مش حافضل واقفة على رجلى كدة كتير

أكيد شوية و حقع حاركع حاختفى من الوجود خالص

لو ما فوقتوش  قريب مصر التعرفوها حتفختفى

فاهمين يا بشررر

حتختفى 

قارن بين السئ و الأسوأ

قارن بين السئ و الأسوأ

   نحتفل خلال ايام قليلة بالذكرى الثانية لثورتنا العظيمة ،ثورة ٢٥ يناير او زى ما فى ناس بتحب تسميها دلوقتى مؤامرة ٢٥ يناير

 لا اعتقد أبدا ولا فى ابعد مكان فى أحلامى و فى أحلام ناس كتير زيى ان كان ممكن أتخيل و إحنا فى ٢٠١١ ان يجى علينا هذى الذكرى و الاقى ناس كتير و بصراحة انا كمان فى بعض الأوقات و نقول .....ولا يوم من أيامك يا مبارك انت و العادلى و حكومتة

 ينهاااار اسود هى وصلت لحد كدة ...بنترحم على ايام حسنى مبارك و حبيب العادلى  يسلاااام ليية يعنى عشان اية مين ابن ال.... المخلينا نوصل للدرجادى

 المهم تعالى نبص للموضوع بواقعية و من غير تحيز ولا حماس أعمى و 

نشوف فعلا هل المفروض نترحم على ايامة ولا ندعى علية و على الجايبينة

 نبدا بالحكومة او بمعنى أدق الاقتصاد لان الحكومة معناها الحقيقي فى الشارع العيش و اللحمة و الفول و الطماطم و الحاجات دى كلها بصراحة العيشة كانت غالية اوووى ايام النظام الفات و كانت الأسعار فى الطالع على طول و المرتبات نادرا لما كانت بتطلع بس بصراحة الواحد كان عارف يعيش

انا مش بتكلم عليا انا بتكلم على الطبقة التحت العائشة تقريبا اليوم بيوم كانو عارفيين يعيشو و كانو بيعلمو عيالهم .اة طبعا كان فى مناظر تقطع القلب و ناس مش لاقية تأكل ..بس اعتقد ان دة موجود فى العالم كللة حتى فى اكتر الدول تقدما
 اما بالنسبة لدلوقتى فحدث ولا حرج على الموقف الاقتصادى المنيل بستين نييلة ...كلام عن الإفلاس و عدم القدرة على دفع المرتبات و الصعود الخطير لقيمة الدولار و من غير ما اى حد من فوق يتكلم ولا يطمنا غير طبعا كلام المرسي بتاع أنتو المفلسوون أنتو السبب اهو أنتو يا وحشيين  الكلام المابياكلش عيش حاف حتى

 نيجى للنقطة التانية مقارنة بسيطة ما بين الاشخاص فى النظام السابق و الحالى و انا مابتكلمش عن الكفاءة عشان إحنا عارفيين القرارات المصيرية كللها كانت بتتاخد من شخص او اتنين زمان و حاليا نفس القصة و النظام تقريبا  انا بتكلم عن الهيئة عن اللباقة عن المنظر العام يعنى
  يعنى لو جيت قارنت ما بين نظيف و فتحى سرور و صفوت الشريف و زكريا عزمى و احمد عز و مابين قنديل و الكتاتنى و العريان و البلتاجى و الشاطر ...اعتقد المقارنة حتبقى محسومة كللها فى طرف واحد ....ولا اية

 ثالثا و يمكن فى نظر ناس كتير اهم نقطة فى الموضوع الأمن حبيب العادلى او اليد الحديدية للنظام السابق و فى نفس الوقت اهم اسباب سقوط هذا النظام بسبب تعاملة الغبى مع المتظاهريين وقت الثورة
 بصراحة البلد كانت أمان .....بس كدة مش محتاج اقول حاجة تانية  ماكنش فى ولا واحد على عشرة من الجرائم بتاعت اليومين دول ،صحيح كان كل فترة كدة تسمع عن حالة خطف واحدة مثلا او حالة قتل غريبة ،بس أكيد مش زى البيحصل اليومين دول من انفلات و قتل و خطف وتمثيل بالجثث
 بس لو ركزت شوية و بصيت على الصورة الاكبر حتلاقى ان اة الحالة الأمنية كانت احسن بكتير بس مش ببلاش كان فى تمن بندفعة كلنا فى مقابل هذا الاستقرار الآمنى
 الثمن كان ان المخدرات منتشرة بمعدل معيين و تحت مراقبة الشرطة عشان يلهو الشعب
الثمن كان اى حد كن الكبار لو غضبو عليك تلاقى الداخلية كللها اتحولت لتحويل حياتك الى جحيم
  الثمن كان ان اى حد معارض للنظام او بيفكر يعمل مظاهرات ولا حاجة كان بياخد فوق دماغ امة لحد ما يقول حرمت او يموت فى ايديهم
 اة إحنا كناس ماشية جنب الحيط و ماكنش ليهم علاقة بالسياسة ماكناش بنحسس بالثمن البيدفع دة بس ماينفعش تقول لا دة ماكنش بيحصل ...لان ساعتها حتكون كداب و بتضحك على نفسك
 انت بقى موافق على هذا الثمن فى سبيل هذا المنتج الهو امن و أمان دة شئ يرجعلك بس كان واجب التوضيح نيجى

رابعا و ليس أخيرا للحوت الكبير الرئيس حسنى مبارك او بمعنى أدق للنظام الحاكم كللة و نظرة عامة على البلد
 مصر كانت احسن ايام مبارك....اة مصر كانت احسن ايام مبارك
 فى الاستقرار احسن فى الأمان احسن فى السياحة احسن فى سمعة مصر خارجيا احسن فى مستقبل ولادنا احسن فى البزنس و الفلوس احسن  يعنى تقريبا كانت احسن فى كل حاجة
 بس قبل ما تصلى ان حسنى يرجع هو و شلتة و تترحم اكتر على ايامة لازم تفهم حاجة واحدة مهمة
 حسنى مبارك هو السبب فى الثورة ...حسنى مبارك هو السبب فى وصول الاخوان للحكم ....حسنى مبارك هو السبب فى الاحنا فية دلوقتى
من غير شتيمة بس و قلة أدب ....افهم السبب للإنا بقولة و بعدين اشتم براحتك
 هذا النظام الغبى العقيم فضل حاكم ٣٠ سنة و حاجة واحدة بس فى دماغة ..... أنة يفضل فى الحكم ان ماحدش ينافسة فى السياسة و الحكم و عشان يعمل كدة فقام بكبت جميع التيارات السياسية ألكانت بتشتغل فى الشارع و منعها من ممارسة اى عمل سياسى حقيقى و فى نفس الوقت الكبت فية السياسين جميعا راح سايب الطيار الدينى يشتغل فى الشارع اعتقادا منة انهم عمرهم ما حيطلعو للنور و اعتقادا بردة ان هذا التيار حيكتفى بالفتافيت البتقع منهم و مافهمش ان الناس دى عمرهم ما حيحترمو عهد ولا صفقة تم الاتفاق عليها و حينقد و ياكلهم مع اول نقطة دم حتنزل من هذا النظام
و دة الحصل فعلا قعدو شغالين فى الشارع من الباطن لمدة اكتر من ٢٠ سنة و عملو شعبية و كسبو ارض من الجهل و الفقر الكان موافرو النظام السابق و فى نفس الوقت قدرو برو يغيرو فى كتير من صفات المواطن المصرى الطيب الكان على طول عندو سماحة و طيبة و تسامح و رضى و كانو البديل للحكومة عند ناس كتير اوى من الغلابة و الجهلة الكانو منسيين من النظام ...
و فعلا مع اول خضوع و جرح فى هذا النظام انقدو عليهم و اكلوهم و أخدو مكانهم فى الحكم
 عشان كدة أنا بقول ان حسنى مبارك و النظام السابق سلمونا تسليم مفتاح لهذا الطيار الدينى المتعطش للسلطة
  كدة الواحد يقدر يحكم بموضوعية بين النظاميين
نظام ديكتاتورى سلطوي غبى متعجرف كان لية شوية حسنات
 و نظام ديكتاتورى فاشى دينى متعجرف بردة بس لسة ماشفناش منة حسنا واحدة و يا عالم حنشوف اصلا منة حاجة ولا ناس تانية هى الحتشوف منة
 لك اللة يا مصر
 لكم اللة يا مصريين